قررت نكتب هاد الكلام لأنني وليت كنقرا بزاف ديال الميساجات والمنشورات كيكتبوهم البنات، المحور الأساسي ديالها هو العلاقات و المشاعر بوركابي كراش.. بلا بلا بلا. بنات غالبا كايكون عمرهم ما بين 21 حتى ل24 سنة. عرفتي اصاحبتي شحال زوينة هاد المرحلة من حياتك، عرفتي كمية الطاقة اللي كاتكون عندك فهاد العمر؟ عرفتي أن هاد الطاقة تقدر تخليك متألقة و إنسانة إيجابية و مثقفة و وااااصلة ؟ و عرفتي أن الارتباط إذا خليتي منو محور حياتك شحال غادي يسد عليك ديال البيبان بالأخص إذا كان مع الشخص الغلط ؟ عرفتي أن هاداك النهار ماقدرتيش توجدي ليكسبوزي مزيان و صبحتي شاحبة و حزينة لأنك بايتة تناكري نتي و واحد الإنسان ما عندك حنى ضمانة أنو غيبقا معاك وغادي يكون بابات ولادك ؟ عافاكم البنات راكم مازالين كتاكييييت على الارتباط والحياة اعمق من اننا نحصروها فعلاقة حب تافهة ، تنقصد الارتباط اللي كايبلوكيك فجميع القرارات الاستراتيجية و التافهة فحياتك. الحب زوين فعلا و لكن مادام الشخص المعني بالأمر ماموجدش نسخة كاملة و شهادة العزوبة و شهادة الخطوبة و شهادة الخلو من الأمراض،، نتي لست مطالبة بأية تضحية كانت أقسم بالله. نهار يجمع وريقاتو و توثقو العلاقة ديالكم بحكم الشرع و العرف هاديك الساعة العيب عليك إذا نتي مضحيتيش معاه بكل ما اوتيت من قوة.